EJ Luce - Elie

L'auteu Jèrriais Edwin John Luce, nom-d'plieunme Elie, fut né l'30 dé Janvyi 1881. Bouon annivèrsaithe, Elie!

EJ Luce (1881-1918) - http://members.societe-jersiaise.org/geraint/jerriais/ejluce.html



Lé monde à ch't heu pour faithe un complyîment
Ne s'craient polis qu'en oubliant l'Jèrriais;
Et chatchun s'sert à tout moment
Et tant bein qu'mal, d'Angliais ou bein d'Français.

Mais pour dé mé, j'aime acouo man canton;
J'n'ai pas besoin, pour mé montrer civil,
D'autchun langage autre que notr' vièr jèrgon -
Et auprès tout, criy'ous qu'i' s'sait si vil?

Les êtrangièrs, qui n'font que d'atterrer
Sont limités à chein qu' i 'pâlaient d'vant;
Mais les Jèrriais dev'thaient dithe en Jèrri
Ès Jèrriais, en Jèrriais, lus sentiments.

Certains ont honte - ou peux d'paler l'Jèrriais;
I'bargouaich'chont du Français mal apprins,
Ou d'l'Angliais d'France - ah! si janmais s'ouïaient!
Et chein qu'est drôle - i'craient qu' i' sont malins!

Elie
1901